Sanskrit Poem ‘Vikalmashaah’ (विकल्मषाः)/Dr.Harekrishna Meher

Original Sanskrit Poem 

‘Vikalmashaah’

By: Dr. Harekrishna Meher

*

विकल्मषाः 

* डॉ. हरेकृष्ण-मेहेरः 

= = = = = = = = = = = = 

सर्वे रत्नाकराः

न विकल्मषा वाल्मीकयः,

सर्वे सुधाकराः

न शीतांशवः कलानिधयः  ॥

सर्वे शङ्कराः

न हालाहल-पान-नीलकण्ठाः,

सर्वा राधिकाः

न कृष्ण-राग-समागमोत्कण्ठाः ॥

सर्वे वामनाः

न बलि-नियमन-कामनाः,

सर्वे उपमन्यवः

न गुरु-भक्ति-साधवः,

सकला एकलव्याः

न द्रोण-गुरु-शरव्याः ॥

सर्वे पुरुषोत्तमाः

न वृत-रमाः ।

सर्वे कालिदासाः

न काव्य-रस-विलासाः,

सर्वा वनिताः

न पातिव्रत्य-धर्म-ध्वनिताः ॥

सर्वे शासकाः

न लोक-विधान-समुपासकाः,

सर्वे नेतारः

न जन-हित-वेत्तारः ॥

समस्ता मन्दाकिन्यः

न भगीरथ-दिग्दर्शिन्यः ।

सर्वा याज्ञसेन्यः

न पार्थ-सनाथाः,

सर्वाः कविता न कालजयिन्यः

नापि हृदयस्पर्शि-गाथाः ॥

सर्वे देश-निवासिनः

न राष्ट्रियता-सुवासिनः,

सर्वे महेन्द्राः

न देवाधिराजा वज्रिणः,

किन्तु सर्वे विश्वादिकन्द-केन्द्राः

सम-गुण-शोणित-धारिणः ॥

* * *