Sanskrit Poem 'Abalaa Mahabalaa' अबला महाबला/ Dr. Harekrishna Meher

'Abalaa Mahabalaa' (Sanskrit Poem) 

By: Dr. Harekrishna Meher

*

अबला महाबला (संस्कृत-कविता) 

रचयिता : डॉ. हरेकृष्ण-मेहेरः 
= = = = = = = = = = = = = = = = 

समाकर्षति सर्वतो धृत-माया

या विमोहयति यति-जन-चित्तम्,

अपहरति सा कुलिश-काया

अबलाख्याऽपि सबलानां बलं सवित्तम् ॥

असामाजिक-व्यभिचारेषु

अमानविक-गर्हित-व्यापारेषु

प्रदर्श्य बलात् प्रलोभनम्,

नारी खलु नारीं नियोजयितुं गहनम्

नात्मानं मन्यते कुण्ठिताम्,

न जानाति स्वां मर्यादां च विलुण्ठिताम् ॥

चिन्तयति नात्मानं पर-व्यथा-प्रमोदिनीं

स्वपदाश्रय-विटपच्छेदिनीं

कुलङ्कषां निम्नगां

पराङ्क-भेदिनीं दुर्भगां

काल-सर्पिणीमात्म-घातिनीम्

ईर्ष्या-दर्पिणीं  दृश्य-बहुलां 

तथाकथितां जननीं महाशङ्कु-सङ्कुलां 

कन्या-भ्रूण-हननीं  स्वजाति-निपातिनीम् ॥

विस्मरति स्वामप्रतीपाम्

सुप्रकाशित-कुल-प्रदीपाम्,

विस्मरति स्वां प्रिय-कन्याम्

स्नेहमयीं च भगिनीम्,

सन्तान-वत्सलां जननीं सुधन्याम्,

जायां च पत्युः सौभागिनीम्,

सुलक्षणां गृहलक्ष्मीमादर्श-स्थानीयाम्

सहानुभूतिशीलां महिलां पूजनीयाम्

ममतायाः प्रतिमां प्रियतमाम्

शक्ति-रूपिणीं देवीमनुपमाम्  । 
महाबले ! जागृहि त्वं सद्‌गुण-सम्पन्ना 
रम्या रमा स्वात्मबलं प्रपन्ना ॥

* * *