Dr. Harekrishna Meher: 'Jahnavi' (जाह्नवी) Sanskrit Poem by Dr.Harekrishna Meher

JAHNAVI' (Sanskrit Poem)

By Dr. Harekrishna Meher

= = = = = = = = = = = =

जाह्नवी (संस्कृत-कविता)

* डॉ. हरेकृष्ण-मेहेरः

(‘पुष्पाञ्जलि-विचित्रा’ -काव्यतः)

= = = = = = = = = = = =

राग-रङ्गिम-तरङ्ग-मालया

मञ्जुला सरस-नाद-गुञ्जना ।

शं तनोतु मधुरा सुधा-रया

ताप-वह्नि-हरणीह जाह्नवी ॥ (१)

या विश्ववारा प्रथमैव संस्कृति-

र्विराजते या पुनती जगज्जनम् ।

सा जाह्नवी-चिह्नित-पुण्यधारा

तनोतु भद्रं रस-भाव-सारा ॥ (२)

त्रिपथगा हि भगीरथ-गौरवा

भुवन-पालन-वर्धन-कारिणी ।

विजयते जगतां जननीव सा

चिर-नवा विमला भुवि जाह्नवी ॥ (३)

या स्वर्गात् समुपागता क्षितितले

शम्भोर्जटा-संश्रिता

पुत्राणां सगरस्य मुक्ति-सरणी

भागीरथी स्वर्णदी ।

रम्या पुण्यजला महाकलुषहा

मन्दाकिनी वन्दिता

माङ्गल्यं जगतां कृते वितनुते

गङ्गा शुभाङ्गी सदा।। (४)

= = = = = = = = = = =

(Extracted from 'Pushpanjali-Vichitra' Giti-kavya

of Harekrishna Meher)

* * * *

Dr. Harekrishna Meher