‘Mahila’ (महिला) Sanskrit Poem: Dr. Harekrishna Meher

‘Mahila’ (महिला) Sanskrit Poem: 
By : Dr. Harekrishna Meher 
= = = = = = = = = = = = = =  
महिला (संस्कृत-कविता)

* डॉ. हरेकृष्ण-मेहेरः  

= = = = = = = = = = = = = =  

नारी एव नारीणां हन्त्री

कम्पते यया शम्पा-पातिन्या

स्वजाति-घातिन्या

लोक-हृदय-तन्त्री ।

परिणय-वेदिकायां युवत्यः

यौतुक-ज्वालायामार्जववत्यः

बलीभवन्ति विवाहिताः

तयैव सपारुष्यं बहुदूर-वाहिताः ॥

यदा वित्त-प्राप्ति-मत्त-चित्ता

श्वश्रू-र्भवति खल-नायिका धूर्त्ता,

ननान्दा वर्त्तते प्रकट-कूटनीति-समर्थिका

परिवारेण सार्धं  चक्रान्त-कारिका,

अदरिद्रा दरिद्रा वा श्येन-दृष्टि-रूपा

पर-द्रव्य-द्रविण-लोलुपा,

जायते दुर्जननी दुर्जना श्वश्रूः,

भवति वधूः प्राणधव-मार्गण-बिद्धा साश्रुः ॥

नारी-नामान्तरा ईर्ष्या,

ईर्ष्या-नामान्तराऽपि नारी ।

कपट-गुरोः पट्टशिष्या

कदा वज्र-मुखी कदा कुसुम-सुकुमारी ॥ 

नारी नववधू-रूपेण रोदिति,

सैव श्वश्रू-रूपा परिवर्त्तिता रोदयति,

स्वकीये प्रतीक्षित-सुखे परिवारे

विषमे संसार-पारावारे

नववधूमपरां स्वागतीकृत्य

कृत्रिम-प्रेम-मन्त्रान् व्याहृत्य ॥

बहु-रूपिण्या रमण्याः

निरक्षराया वा विदुष्याः

चित्तं ज्ञातुममुष्याः

यदा न प्रभवन्ति देवाः शरण्याः,

कुतो वा सामान्य-मनुष्याः

शंसित-सांसारिक-कालुष्याः ?

सा नाभिजानाति सुरूपां महिलां  

स्वां महीयसीं  सुगुणशीलां   

धर्मधारिणीं  सत्कर्मकारिणीं

सदाचारिणीं  जगदुद्धारिणीं  

प्रेम-मङ्गलमयीं मूर्त्तिमद्वितीयां 

समादरणीयां  महनीयां

सुगृहिणीं लक्ष्मी-स्वरूपिणीं  

क्ष्मा-प्रतिमां देवत्व-प्रसारिणीं

कला-सौन्दर्य-निधानभूताम् 

मा-पर्यायां  स्वमर्यादा-परिपूताम्  ॥ 

* * * 

‘Jivanaalekhyam’ Kavya : Link :

http://hkmeher.blogspot.in/2017/02/jivanaalekhyam-modern-sanskrit-kavya.html

= = = = = =