Nira O Samira (Odia Poem) by Dr. Harekrishna Meher
****
नीर ओ समीर (ओड़िआ कविता)
रचयिता : डॉ. हरेकृष्ण मेहेर
====
* ନୀର ଓ ସମୀର *
(ଓଡ଼ିଆ କବିତା)
ରଚୟିତା : ଡକ୍ଟର୍ ହରେକୃଷ୍ଣ ମେହେର
==========
ସବୁରି ପ୍ରାଣ-ଧାରଣ ନିମନ୍ତେ ନିଶ୍ଚିତ
ତୁମେ ଅଟ ବିନ୍ଦୁରୂପ ସଲିଳ ! ଜୀବନ !
ତୁମ ବିନା ଧରାରେ କେ ରହିବ ଜୀବିତ,
ସବୁ ରସ ମଧ୍ୟେ ତୁମେ ରଚିଛ ଭବନ ।। (୧)
ହେ ସମୀର ! ତୁମେ ମଧ୍ୟ ପ୍ରାଣରୂପ ଅଟ,
ତୁମ ବିନା ମୁହୂର୍ତ୍ତକ ପାରିବ କେ ରହି ?
ଜୀବନରୂପେ ଆବୋରି ଅଛ ସର୍ବଘଟ,
ତୁମ ବିହୀନେ ନିର୍ଜନ ହେବ ସାରା ମହୀ ।। (୨)
ଦ୍ରୁମ-ଲତା ଚରାଚର ସମସ୍ତ ପରାଣୀ
ତୁମରି ସହାୟେ ନୀର ! ଅଛନ୍ତି ସଂସାରେ ।
ରବି-କର ତୁମ ସର୍ବ ଗୁଣ ଶୋଷି ଆଣି
ବାରିଦ ରୂପରେ ଶାନ୍ତି ଦିଏ ବରଷାରେ ।। (୩)
ଗନ୍ଧବହ ! ଦୂର ଦେଶୁଁ ଶୁଦ୍ଧ ସୁମହକ
ବହି ଆଣ ଆମ ଦେଶେ ବିକାଶି ସୁମନ ।
ସକଳ ହୃଦୟେ ସୁଖେ ଜଗାଅ ପୁଲକ
ହିଲ୍ଲୋଳେ ଉଡ଼ାଅ ଦେଶ-ବିଜୟ କେତନ ।। (୪)
ହେ ନୀର ! ଏ ଅବନୀର ସର୍ବ ଜୀବଜନ୍ତୁ
ଆଶ୍ରିତ ସନ୍ତତ ତୁମ ନିକଟେ ନିକର ।
ଯୁଗେ ଯୁଗେ ସର୍ବେ ସଦା ପ୍ରମୋଦେ ରହନ୍ତୁ
ଜୀବନ-ପୋଷଣେ ତୁମେ ପ୍ରିୟ-ହିତକର ।। (୫)
ବିହାୟସେ ମେଘମାଳ ପଛେ ଅନୁସରି
ଇତସ୍ତତଃ ଚାଳି ତାକୁ କରାଅ ଭ୍ରମଣ ।
ଚଣ୍ଡ ପ୍ରଭଞ୍ଜନ ରୂପେ ଭୀମ ମୂର୍ତ୍ତି ଧରି,
ଧ୍ୱଂସ କରିପାର ବିଶ୍ୱ ଆହେ ସମୀରଣ ! ।। (୬)
ଜଳ ହେ ! ଧରମ ତୁମ ନିମ୍ନକୁ ଗମନ,
କେ ତାହା ଟାଳିବା ପାଇଁ ନୁହଇ ସମର୍ଥ ।
ପ୍ରଳୟ ରୂପେ ସକଳ ଜଗତ ଜୀବନ,
ବିନାଶ କରଣେ ତୁମ ଶକତି ଅବ୍ୟର୍ଥ ।। (୭)
ବହ୍ନି-ମିତ୍ର ସାଜି ବାୟୁ ! ବନ-ପ୍ରଦେଶରେ
ପ୍ରଜ୍ୱଳିତ କର ତାକୁ ଉତ୍ତୁଙ୍ଗ ଶିଖାରେ ।
ମାତ୍ର କ୍ଷୁଦ୍ର ଦୀପଟିଏ ଥିଲେ ଭୂମି ପରେ
ନିର୍ବାପିତ କର ତାକୁ କହ କି ପ୍ରକାରେ ? ।। (୮)
ନିରିମଳ ଜଳ ବାୟୁ ଉଭୟେ ପାବନ,
ତୁମ ସ୍ଥିତି କରେ ସର୍ବ କଲ୍ୟାଣ ସାଧନ ।
ତୁମ ବିନା କେବା ରଖି ପାରିବ ଜୀବନ ?
କେ କରିପାରିବ ତବ ଗୁଣର ଗଣନ ? ।। (୯)
ନୀର ! ସମୀର ! ଯୁଗଳ ମିଳି ପରସ୍ପର
ସହାୟକ ହୋଇଥାଅ ବିଶ୍ୱର ରକ୍ଷଣେ ।
ଜନ ଉପକାର ଲାଗି ତୁମେ ନିରନ୍ତର
ଶିଖାଅ ତବ ସୁଗୁଣ ସୁମଙ୍ଗଳ କ୍ଷଣେ ।। (୧୦)
ଈଶ୍ୱର ସୃଷ୍ଟିର ତୁମେ ଅମୃତ ରଚନା,
ଦେଶେ ଦେଶେ ଚିରକାଳ ସ୍ୱଚ୍ଛନ୍ଦେ ବିହରି ।
ଶୁଭପ୍ରଦ ହୋଇ ସଦା ଲଭ ଅରଚନା,
ଖେଳାଅ ଜନ-ଅନ୍ତରେ ଶାନ୍ତିର ଲହରୀ ।। (୧୧)
====
(ରଚନା : ତା: ୪-୧୨-୧୯୭୨)
====
'କବିତାବଳୀ-ମାଧୁରୀ' (କବିତା ସଙ୍କଳନ)ର ଅନ୍ତର୍ଗତ * Included in "KAVITAVALI-MADHURI"(Anthology of Odia Poems) By Dr. Harekrishna Meher :
Link : Kavitavali-Madhuri : କବିତାବଳୀ-ମାଧୁରୀ : https://hkmeher.blogspot.com/2026/04/l-kavitavali-anthology-of-odia-poems-by.html
***
ନୀର ଓ ସମୀର (କବିତା) :
https://hkmeher.blogspot.com/2026/10/nira-o-samira-odia-poem-by-dr.html
*****
No comments:
Post a Comment