Swabhavakavi Gangadhara Smarane * (Odia Poem)
By Dr. Harekrishna Meher
--------
* स्वभावकवि गङ्गाधर स्मरणे *
(ओड़िआ कविता)
रचयिता : डॉ. हरेकृष्ण मेहेर
=====
* ସ୍ବଭାବକବି ଗଙ୍ଗାଧର ସ୍ମରଣେ *
(ଓଡ଼ିଆ କବିତା)
ରଚୟିତା : ଡକ୍ଟର୍ ହରେକୃଷ୍ଣ ମେହେର
(ରାଗ - ଚୋଖି)
=========
ହେ ସ୍ୱଭାବ-କବିବର !
ଘେନି ମର କଳେବର,
ଜନ୍ମିଲ ପ୍ରିୟ ସନ୍ତାନ
ଭାରତୀଙ୍କର ।
ଜାତିର ହିତ ସକାଶେ
ଓଡ଼ିଆ-ସାହିତ୍ୟାକାଶେ
ବିହରି କାବ୍ୟ-ପ୍ରକାଶେ
ହେଲ ଭାସ୍ବର ।
ସାରସ୍ୱତ ସାଧନା ଫଳେ,
ଅଜ୍ଞାନ-ତିମିରହାରୀ ହେଲ ଭୂତଳେ ।। (୧)
ବିକାଶି ଶୁଭ୍ର କୀରତି
ତୁମରି ପ୍ରିୟ ଭାରତୀ
ଜନ-ମନରେ ପୀରତି
ଜନମ କରେ ।
ପୂର୍ବେ କି ତପୋବରତ
ଆଚରଣେ ହେଲ ରତ,
ଅବତରିଲ ଭାରତ-
ବର୍ଷେ ବିଶ୍ୱରେ ।
ପୂର୍ଣ୍ଣ ହେଲା ଦିବ୍ୟ ବାସନା,
କୃପା ବିତରିଲେ ବାଣୀ କମଳାସନା ।। (୨)
ସ୍ମରେ ଇନ୍ଦୁମତୀ-ଗୁଣ
ଅଜ ନରେଶ ତରୁଣ,
ଭାବ-ଆବେଗେ କରୁଣ
ରସ ଝରଇ ।
କଣ୍ବ-ଲାଳିତା ନନ୍ଦିନୀ
ତପୋବନ-ବିନୋଦିନୀ ଦୁଷ୍ମନ୍ତ-ପ୍ରୀତି-ବନ୍ଦିନୀ
ହୋଇ ଝୁରଇ ।
ତପସ୍ୱିନୀ ଜାନକୀ ରହେ,
ବାଲ୍ମୀକି-ଆଶ୍ରମ ଆଶ୍ରି ରାମ-ବିରହେ ।। (୩)
ନୀଚକର୍ମେ ଦେଇ ମତି
କୀଚକ ଭଜେ ଦୁର୍ଗତି,
ଉତ୍କଳ-ଲକ୍ଷ୍ମୀ ସମ୍ପ୍ରତି
ଝୁରେ ବାସ୍ତବେ ।
ବିତରିଲ ଅର୍ଘ୍ୟଥାଳୀ
ମହିମାର ଦୀପ ଜାଳି,
ଗୌତମ-ଶାପ ପ୍ରକ୍ଷାଳି
ଅହଲ୍ୟାସ୍ତବେ ।
କବିତା-କଲ୍ଲୋଳେ ପ୍ରକୃତି,
ପୁଲକିତ କଲ ବର୍ଣ୍ଣି ସୁକାବ୍ୟକୃତି ।। (୪)
ଏଡ଼ାଇ ବିଘ୍ନ-ପରବ
ବଢ଼ାଇ ମାତୃ-ଗୌରବ
ଭାବେ ମୋହିଲ ସରବ
ଜନ-ହୃଦୟ ।
ଈଶ୍ୱରେ ଦେଲ ଅକ୍ଷୟ
ପବିତ୍ର ଭକ୍ତି ତନ୍ମୟ,
ବିଶ୍ୱ ହେଲା ମଧୁମୟ
ଅମୃତମୟ ।
ପ୍ରକୃତିର ପ୍ରିୟ ପୂଜାରୀ,
କଲ ଭାରତୀ-ଭାବନା ଭାରତେ ଜାରି ।। (୫)
ତବ ସ୍ୱର୍ଗୀୟ ସରସ
ଲେଖନୀରୂପ ପରଶ-
ମଣିରେ ତ ଆଦରଶ
ରତ୍ନ ରଚିଲ ।
ସହୃଦୟ-ହୃଦଗତେ
କାଳେ କାଳେ ଏ ଜଗତେ
କବିତା-ସୁଧା ସଙ୍ଗତେ
ଯଶ ସଞ୍ଚିଲ ।
ଓଡ଼ିଶାର ଯୋଗ୍ୟ କୁମର,
ନମସ୍ୟ ଅମର ସଦା ନାମ ତୁମର ।। (୬)
======
(ରଚନା : ତା: ୯-୬-୧୯୭୩)
======
'କବିତାବଳୀ-ମାଧୁରୀ' (କବିତା ସଙ୍କଳନ)ର ଅନ୍ତର୍ଗତ *
Included in "KAVITAVALI-MADHURI"
(Anthology of Odia Poems)
By Dr. Harekrishna Meher
*
Link : Kavitavali-Madhuri :
କବିତାବଳୀ-ମାଧୁରୀ (କବିତା ସଙ୍କଳନ) : https://hkmeher.blogspot.com/2026/04/l-kavitavali-anthology-of-odia-poems-by.html
***
ସ୍ବଭାବକବି ଗଙ୍ଗାଧର ସ୍ମରଣେ (କବିତା) :
https://hkmeher.blogspot.com/2026/10/swabhavakavi-gangadhara-smarane-odia_01712066873.html
*****
No comments:
Post a Comment